O Programa “Doutoramento en Dereito” é unha proposta sólida, ambiciosa e con vocación de futuro. Intégrase na Escola de Doutoramento Internacional da USC e é un Programa totalmente vinculado a esta Universidade, sen prexuízo de que deixa abertas portas á posibilidade de colaboración futura con outras institucións españolas ou estranxeiras coas que xa se posúen fortes vínculos que se especifican no Programa. O devir e o asentamento do Programa, así como a súa previsible fortaleza en canto ao número e calidade das teses doutorais que se dirixan, determinarán a concreción desas colaboracións. Tomando o concepto da propia Universidade, trátase dunha proposta que aglutina prácticamente todas as ramas do Dereito. Esta opción fuxiu, ademais, dunha atomización de liñas de investigación en aras da consolidación de múltiples perspectivas en sete grandes liñas que permiten dotar a esta etapa formativa dun enfoque superador da división en áreas de coñecemento favorecendo sinerxias entre grupos. Iso xa supuxo un primeiro compromiso por parte dos doutores participantes: o compromiso de definir esas liñas e achar o común denominador con outros doutores de disciplinas non afíns. O compromiso de compartir esforzos que se traducirá, sen dúbida, en beneficio dos doutorandos que poderán atopar entre os docentes do Programa non meramente a un titor e/ou un director de tese, senón a un grupo de apoio eficaz para o bo fin do seu traballo de doutoramento.
Esta opción aglutinadora tamén permite a suma de masa crítica e a exhibición duns resultados científicos solventes. O programa vén avalado non só pola actualidade dun apoio financeiro importante, captado en convocatorias competitivas de distinto ámbito (autonómico, nacional e internacional), senón, quizá o máis importante, por unha traxectoria dos docentes e grupos que o integran que acredita que tal recoñecemento académico, científico e financeiro non é pasaxeiro, senón que ten asentadas raíces e unha sólida traxectoria.
Con estes mimbres, o Programa non pode senón ser ambicioso e ter unha vocación de permanencia no tempo de xeito indefinida. Todo iso, sen prexuízo da súa apertura á evolución, a mellora e a concreción de relacións estables con outras institucións. Unha das grandes opcións estratéxicas que determina a concentración no Programa da súa importante masa crítica é, precisamente, o compromiso por facer do Programa unha referencia estable e permanente no marco normativo actual. Non é allea a esta decisión a conciencia de que é necesario optimizar os recursos dispoñibles na situación de crise que aqueixa á Universidade española. O compromiso social da Universidade esixe que a súa oferta sexa seria, estable e permanente; que a súa oferta non poña a quen a aceptan nunha situación de certa interinidade. Preténdese que o Programa do Doutoramento en Dereito da USC chegue a formar parte da paisaxe estable da USC como, doutra banda, reclama a propia tradición e a posición que a USC posúe no contexto universitario nacional e autonómico. E, neste mesmo sentido, os participantes no Programa están comprometidos a que sexa parte da paisaxe da oferta a nivel nacional e internacional.
Un dos retos deste programa é cumprir coa aspiración de todas as universidades europeas (así por exemplo, a Declaración de Glasgow adoptada no Consello da European Universities en 2005) no sentido de que os estudos de doutoramento sirvan non só para o inicio da carreira académica (ata agora o interese maioritario, por non dicir o único do Doutoramento en Dereito), senón tamén como un valor engadido no mercado laboral, na empresa privada e na función pública. Aínda que é evidente que a valorización do título de doutor como factor de empregabilidade depende de moitos máis axentes que os responsables deste Programa, non queremos descoidar este aspecto. As sete liñas de investigación son idóneas para realizar traballos de investigación de corte puramente académico ou máis próximo á práctica xurídica de cada día. A Comisión Académica do Programa coidará de que se realicen tese en ambas vías e procurará a máxima difusión daquelas que teñan especial conexión coa empresa, a Administración e o mercado.
Desde o punto de vista metodolóxico, o propósito deste Programa é atender adecuadamente non só ao produto final obtido polo doutorando (a tese), senón sobre todo ao proceso (ensino/aprendizaxe do que é a investigación xurídica), convencidos de que as competencias e habilidades adquiridas durante o mencionado proceso capacitarán ao futuro doutor para unha gran variedade de saídas profesionais. Noutra orde de cousas, e seguindo as indicacións da axencia avaliadora sinálase expresamente que das 15 prazas ofertadas, 5 o serán a tempo parcial.
Programa de Doutoramento en Dereito pretende axustarse ás seguintes liñas establecidas no Plan estratéxico da USC 2011-2020:
• Oferta de titulaciones adaptada ás necesidades da sociedade
• Procura da excelencia na docencia
• Cara á excelencia investigadora
• Unha universidade de recoñecido prestixio internacional
Aprovéitase a oportunidade suscitada polo cambio da normativa reguladora dos programas de doutoramento para axustar a súa oferta á política investigadora da USC, e incrementar a colaboración con outras universidades e institucións de investigación para a optimización dos recursos dispoñibles, así como para reforzar áreas estratéxicas da Universidade. Ademais preténdese unha maior integración entre as actuais titulacións de grao coas novas propostas de programas de doutoramento.
O Programa adecúase á actuación prevista nas liñas estratéxicas 1 e 2, conformando unha oferta de posgrao especializada e competitiva, incrementando o prestixio social dos estudos de posgrao en Dereito.
En relación coa liña 3 , coa oferta proposta preténdese reforzar o prestixio da traxectoria investigadora da USC no ámbito xurídico e promocionar o seu valor social e económico.
Finalmente, en relación á liña 4. Nesta primeira fase procurouse establecer colaboracións con investigadores e centros estranxeiros. Separadamente das múltiples redes e conexións que posúen cada unha das liñas, o Programa incrementaría a política de participación en Proxectos Europeos. Neste sentido, nunha das liñas cóntase neste momento cun Proxecto Europeo en vigor.
