5 motivos polos que estudar o Máster en Enxeñaría Agronómica do Campus Terra da USC

O obxectivo xeral do Máster en Enxeñaría Agronómica é a formación de técnicos superiores capacitados para planificar, proxectar, organizar, controlar e dirixir os sistemas e procesos produtivos desenvolvidos no sector agroalimentario, incluíndo as infraestruturas e instalacións necesarias para o desempeño eficiente das devanditas actividades produtivas, todo iso nun marco de protección e conservación do medio ambiente e de desenvolvemento e mellora do medio rural. Porque queremos o mellor para ti, hoxe presentámosche 5 motivos polos que estudar o Máster en Enxeñaría Agronómica do Campus Terra da USC.

1. Terás máis posibilidades de conseguir emprego.

A titulación de Máster en Enxeñaría Agronómica ten unhas moi boas expectativas de inserción laboral no futuro máis próximo. Segundo a revista Forbes, é unha das profesións do futuro para a próxima década, debido ao aumento das necesidades de producir alimentos para unha poboación mundial en crecemento, cuns recursos de auga e terra cultivable limitados. Estas expectativas foron confirmadas coa recente presentación do plano estratéxico da Federación Española de Industria da Alimentación e Bebidas, que prevé crear 60.000 postos de traballo nos próximos 6 anos.

2. Accederás a postos de traballo mellor remunerados.

O Máster en Enxeñaría Agronómica tamén permite acceder a postos de maior cualificación e salario en compañías multinacionais ou en traballos no estranxeiro. O nivel de Máster ten un maior recoñecemento internacional no exercicio profesional como Enxeñeiro Agrónomo.

3. Disporás da mellor infraestrutura para desenvolver as prácticas.

A infraestrutura e equipamento dispoñibles son os existentes na Escola Politécnica Superior, o que permite desenvolver prácticas en laboratorio, en aulas de informática ou nas fincas de prácticas do centro.

4. Tamén poderás realizar prácticas en empresas.

O centro dispón de arredor de 500 convenios en activo con empresas e institucións onde poder realizar as prácticas externas.

5. Estudarás nun Campus especializado.

Lembra que o Campus Terra é o campus da Universidade de Santiago de Compostela especializado na sostibilidade económica, social e medioambiental do uso da terra.

Matricúlate xa!!! Só tes que premer aquí!!! Últimas prazas dispoñibles.