A Casa do Saber acolle este venres unha charla concerto de presentación das composicións para piano de Xoán Montes

O auditorio da Casa do Saber do Campus Terra da USC acubillará este venres, a partir das 20.00 horas, a charla-concerto de presentación do volume ‘Obras para piano so’, do compositor lugués Xoán Montes Capón, unha obra co editada por Dos Acordes e pola Axencia Galega das Industrias Culturais na colección Ars Gallaeciae Musicae.

Esta sesión, e acceso gratuíto e entrada libre para todo o público interesado, contará cunha contextualización a cargo dos profesores Villanueva e Trillo e rematará cun pequeno recital a cargo do pianista estradense Javier Otero Neira.

O programa do recital que ofrecerá Otero Neira inclúe cinco composicións do lugués Xoán Montes, ademais doutras pezas, tamén para piano, compostas por José Baldomir e Marcial de Torres Adalid, contemporáneos do músico lugués, considerado como un dos máximos expoñentes do rexurdir musical galego.

Un referente do rexurdir musical galego

Xoán Montes Capón (1840-1899) é, xunto con Marcial del Adalid e Pascual Veiga, un dos máximos expoñentes do rexurdir musical galego. A súa obra, máis popularizada polas súas baladas a partir de poemas galegos (como ‘Negra Sombra’, ‘Doce sono’ ou ‘As lixeiras anduriñas’), inclúe un importante volume de composicións relixiosas, corais, orquestrais e pianísticas aínda escasamente coñecidas mesmo entre o público galego. 

Con este volume –o número 30 da serie Agra Vella dentro da colección Ars Gallaeciae Musicae, na que viron a luz obras de Gaos, de Gustavo Freire, de Manuel Quiroga, e do mestre de capela compostelán José Vaquedano, entre outros– a Xunta de Galicia pretende contribuír á difusión da obra para piano e harmonio deste compositor lugués, maioritariamente aires bailables característicos do seu tempo, co obxectivo de facilitar a súa incorporación aos repertorios dos intérpretes actuais e de promover un maior coñecemento do patrimonio histórico musical de Galicia.