Aberta a matrícula no módulo de rodaxe cinematográfico do Espazo de Cine do Campus Terra da USC

A Oficina de Cultura da USC no Campus Terra mantén aberto o período de matrícula para o módulo 5 do seu Espazo de Cine, centrado no eido da rodaxe e que será impartido polo cineasta Andrés Goteira, director e guionista do filme ‘Dhogs’, que opta a 17 galardóns na próxima entrega dos XVI Premios Mestre Mateo.

O Espazo de Cine da USC no Campus Terra aspira a formar o alumnado inscrito para que sexa capaz de crear e producir a través de módulos monográficos que permitan unha formación mínima para enfrontarse á realización de traballos audiovisuais. As persoas interesadas poden cursar, por separado ou conxuntamente, cada módulo e quen xa participara nos módulos anteriores, centrados nas diferentes fases de creación de proxectos audiovisuais, dándolle preferencia a quen fixera un maior número deles, poderá acceder a este módulo 5 sobre rodaxe.

Esta acción formativa, de trinta e dúas horas de duración, comezará o 18 de marzo, en horario de 16.00 a 20.00h, e continuará os días 25, 26 e 27 entre as 10.00 e as 14.00h e de 16.00 a 20.00h. O curso rematará o 28 en quenda só de mañá. As inscricións poden realizarse a través do enderezo electrónico cultura.lugo [at] usc.es (cultura[dot]lugo[at]usc[dot]es)