Antón & Maite ‘Piano Dúo’ actúan este xoves 16 ás 20.00h na Casa do Saber

A Casa do Saber acolle este xoves 16 de maio, a partir das 20.00h, a actuación de Antón & Maite ‘Piano Dúo’ no marco do ciclo ‘Músicas a carón da Mosqueira’ que impulsa a novos creadores e intérpretes dentro da música clásica e que se financia a través do convenio Lugo Cultural integrado por USC, Concello e Deputación de Lugo.

Antón e Maite conforman un dúo español de proxección internacional. Teñen ofrecido recitais en países como España, Austria, Polonia e China, actuado en salas como o Auditorio de Zaragoza ou o Gran Teatro de Harbin (China). A prensa musical descríbeos como un dúo "con gran sensibilidade e gusto musical", ademais de "amosar unha perfecta sincronización entre ambos os dous pianistas”.

Gañadores do 1º Premio no Concurso Internacional de música de cámara Mirabent i Magrans, contan tamén co 2º Premio no Concurso Mocidades Musicais de España, 2º Premio no Concurso Internacional Antón García Abril, 2º Premio no Concurso Internacional de Panticosa e 3º Premio no Concurso Internacional Martha Debelli.

O dúo formouse no Conservatorio Superior de Música de Aragón, baixo a tutela do pianista Miguel Anxo Ortega Chavaldas e o Dúo Del Valle, recibindo tamén consellos do Cuarteto Quiroga e do dúo Moreno-Gistaín. Actualmente residen en Austria, onde realizan un master de especialización en dúo pianístico co prestixioso dúo Silver-Garburg, na Kunst Universität de Graz.