Formación do Profesorado acolle unha xornada de orientación laboral

O salón de actos da Facultade de Formación do Profesorado do Campus Terra acolle este xoves 12 de abril, a partir das 13.00h, unha xornada de orientación laboral, de acceso libre e de balde, organizada polo propio centro e pola vicerreitoría de Servizos do campus de Lugo.

Os procesos de selección, métodos acaídos para a busca de emprego e prácticas ou a planificación da carreira profesional serán algúns dos temas abordados nunha sesión na que se terá moi en conta a proxección dixital dos e das candidatas, afondando no deseño dun óptimo perfil en LinkedIn, como atopar emprego na web, ou a construción dunha boa marca persoal.

Finalmente, na xornada, impartida pola responsable da área de Orientación e Inserción Laboral da USC no Campus Terra, Gloria Cruz, amosarase como redactar un bo currículo, que fontes de información deben manexarse, así como as distintas oportunidades de emprego e prácticas en Europa.