Gonçalo Guerreiro actúa este xoves ás 21.00h no Lubicán Íntimo

A Casa do Saber acolle este xoves 9 de maio ás 21.00, no marco do Lubicán Íntimo, a actuación de Gonçalo Guerreiro, quen presenta un repertorio de temas en portugués a partir de poemas de Fernando Pessoa.

"Estas cancións xorden das sensacións e pensamentos que foron nacendo en min ao longo dos anos que levo vivindo en Galicia. Existen para que eu poida atopar memorias da cidade onde nacín, Lisboa, no lugar onde agora vivo", afirma Guerreiro. Este repertorio está integrado por cantigas enraizadas na música lusófona que buscan unha sonoridade universal.

Paralelamente ao seu traballo musical, Gonçalo Guerreiro é actor e director da compañía Elefante Elegante. No espectáculo en vivo usa os seus recursos escénicos para establecer co público unha relación de complicidade. Neste caso, levaranos de viaxe desde a formación do reino de Portugal até a Revolución de Abril. O espectador mergúllase nun universo rítmico e melódico que viaxa do humor á nostalxia, do rock á canción de amor, do pop ao jazz, pasando sempre polo Fado.

O Lubicán é un programa pertencente ao convenio Lugo Cultural do que forman parte USC, Concello e Deputación de Lugo.