O Acelerador de Transferencia bota a andar no Campus Terra da USC

A Área de Valorización, Transferencia e Emprendemento da USC (AVTE) acaba de iniciar a cuarta edición do Acelerador de Transferencia, programa dirixido a avanzar no proceso de maduración de resultados de investigación, facilitando a súa transferencia á contorna social e económica. O Acelerador de Transferencia leva a cabo as accións necesarias para cubrir a fenda entre os resultados dun proxecto de investigación e un coñecemento o suficientemente maduro para que resulte de interese para unha empresa ou outro axente externo, co obxectivo de aumentar as posibilidades de transferencia e, polo tanto, o seu valor.

A xornada de presentación do programa, celebrada no edificio Cactus do Campus Terra, foi presidida polo vicerreitor de Desenvolvemento Científico e Tecnolóxico do Campus de Lugo, Andrés Barreiro Lois; e do adxunto ao reitor para Transferencia, Innovación e Emprendemento, José Manuel Cotos Yáñez. A continuación, o director da AVTE, José Luis Villaverde Acuña, explicou as características do programa e as súas fases. A xornada rematou coa presentación de dous casos de éxito do Acelerador, o do profesor do Departamento de Patoloxía Animal da Facultade de Veterinaria Gonzalo Fernández e o do profesor do Departamento de Farmacia e Tecnoloxía Farmaceútica Francisco Otero Espinar. Este xoves 30 celebrarase o acto de presentación en Santiago de Compostela. 

Aqueles proxectos que aspiren a obter o respaldo do Acelerador de Transferencia da USC deberán identificar claramente cal é a brecha existente entre o resultado de investigación e o seu mercado potencial, debendo existir un destinatario final ou socio desenvolvedor para o proceso de transferencia co cal (no caso de que o proxecto resulte exitoso) se establecería un acordo de licenza ou se procedería á creación dunha spin-off.

Para a selección de proxectos candidatos a obter o respaldo do Acelerador de Transferencia, valorarase o grao de novidade; a posibilidade de protexer os resultados obtidos por patente ou por outro mecanismo de protección da propiedade intelectual; o grao de madurez; a importancia da necesidade social que busca resolver ou satisfacer co produto desenvolvido; as posibilidades comerciais (mercado ao que se dirixe e vantaxes competitivas do produto resultante); e implicación do grupo de investigación no proceso de transferencia.

Os Grupos de Investigación (GI) interesados en presentar propostas ao Acelerador de Transferencia poden facelo dirixíndose á AVTE (avte [at] usc.es (avte[at]usc[dot]es), ext. 15581, 15586) ou directamente a calquera persoa da AVTE coa que traballaran anteriormente. A AVTE asignaralles un Xestor/a de Proxecto (XP) que lles informará detalladamente das condicións do Acelerador de Transferencia e asesoraraos durante todo o proceso, dende a preparación da proposta ata a súa comercialización. O prazo remata o venres 15 de xullo. 

AVTE

A Área de Valorización, Transferencia e Emprendemento (AVTE) é o servizo dependente da Vicerreitoría de Investigación e Innovación da USC encargado da xestión integral do proceso de transferencia dos resultados de investigación xurdidos no seu seo. O seu obxectivo é conseguir un impacto directo na sociedade dos resultados de investigación obtidos nos laboratorios e centros de investigación da USC, a través da súa incorporación en procesos, produtos ou servizos, e que polo tanto redunde no crecemento económico e na mellora do benestar social. A USC leva máis de 25 anos transferindo resultados de investigación e figura entre as dez universidades españolas líderes en número de solicitudes e en contratos de licenza, posuíndo unha carteira de máis de 200 patentes. Nos últimos 10 anos, foron creadas máis de 40 empresas baseadas en coñecemento xerado na USC.