O Programa Explorer en Lugo impulsa un proxecto para poñer en valor a madeira local
Andreina Mitsai Vargas Carrión e Daniela Lourenço Dos Santos, promotoras do proxecto Timbersoul, veñen de presentar no Centro Explorer de Lugo, un proxecto de base tecnolóxica que pon en valor a madeira local ofrecendo un servizo integral de asesoramento e comercialización de sistemas estruturais innovadores e ecolóxicos.
Este proxecto, primeiro finalista do Programa Explorer en Lugo, tamén foi seleccionado para competir na categoría Disruptive Technology Explorer Award, que impulsa INDRA e poderá optar a 3.000 euros para o seu desenvolvemento e asesoramento por parte dos profesionais de Indraventures.
As premiadas viaxarán o 31 de outubro a Silicon Valley, California, xunto a outros 55 mozos e mozas, un por cada Explorer Space que o programa posúe en toda España, Arxentina e Portugal. A axenda desta semana de inmersión no principal ecosistema de tecnoloxía e innovación do mundo inclúe visitas a empresas tecnolóxicas líderes como Google, Facebook, Apple ou Airbnb, masterclasses en universidades como Singularity University ou Standford e contacto con inversores.
Ao seu regreso, os 56 mozos e mozas asistirán á Ciudade Grupo Santander de Boadilla del Monte onde un xurado integrado por representantes do Banco Santander, CISE e entidades colaboradoras seleccionará os gañadores nacionais de Explorer 2019. Os tres mellores emprendedores recibirán unha dotación económica (30.000, 20.000 e 10.000 euros) para que poidan acelerar os seus proxectos.
RADIS Ibérica, segundo proxecto finalista promovido por Aitor Rego López e Ana Losada Lombardía, é unha empresa de innovación tecnolóxica especializada na medición, emisión de informes e minimización de gas radón que a través do desenvolvemento dun sistema propio e intelixente de medición de concentración e de baixo coste, é capaz de mostrar en tempo real os valores de radón dunha edificación aos seus usuarios a través dunha app móbil.
Woman Explorer Award
O proxecto Sondeiquí, terceiro finalista e impulsado por Laura López Lorenzo, foi seleccionado polo xurado como finalista para o premio Woman Explorer Award que patrocina a Fundación EY e optará en novembro a un galardón de 20.000 euros.
Soindeiquí é unha empresa que proporciona aos mais exquisitos padais os mellores sabores de cada país producidos e comercializados en Galicia, de forma artesanal, ecolóxica e respectando o medio ambiente. Entre os seus produtos estrela producirase Huitlacoche Galego, un fungo que medra nos graos de millo en México, de onde é orixinario, e na alta cociña considérase un manxar. Ademais de estas mencións todas as categorías contaron cun premio de Hosting dun ano e dominio por parte da empresa luguesa Raiola Networks.
O programa Explorer, está xestionado pola USC a través da Área de Valorización, Transferencia e Emprendemento, e conta con dous centros: Explorer USC Santiago, situado no Edificio Emprendia do Campus Vida, e Explorer USC Lugo, situado na Facultade de Administración e Dirección de Empresas do Campus Terra.
O programa conta co apoio da Xunta de Galicia a través da Secretaría Xeral de Emprego da Consellería de Economía e Industria e, no caso de centro Explorer USC Lugo, co apoio da Deputación Provincial de Lugo.