XuvenCiencia pecha a mellor preinscrición da súa historia con 253 alumnos, 48 máis que na última edición deste campus de verán

A V edición do Campus de Verán XuvenCiencia pechou a mellor preinscrición da súa historia con 253 alumnos/as, 48 máis que na edición de 2016, dos cales só os 135 primeiros/as preinscritos/as poderán participar no programa divulgativo do Campus Terra, cuxa primeira lista de admitidos/as publicarase este xoves 11 de maio.

Unha vez publicada a primeira listaxe, os aspirantes poderán formalizar a súa matrícula na web de XuvenCiencia entre o 11 e o 17 de maio. A maior parte do alumnado preinscrito procede da provincia de Lugo (95), seguida de A Coruña (69), Pontevedra (57) e Ourense (15). Este ano, produciuse un forte incremento do alumnado dende fóra de Galicia, concretamente, dende as provincias de Madrid, Burgos, Huesca, Ávila, Barcelona, Girona, Murcia, Toledo e Zaragoza. Ademais, na presente edición tamén solicitaron inscrición estudantes procedentes das cidades portuguesas de Porto e Braga.

Este campus de verán, que terá lugar entre o 2 e o 8 de xullo, e que está orientado a estudantado preuniversitario de 4º de ESO e Bacharelato, presenta un ameno programa de aprendizaxe e convivencia, a través do que se busca dar a coñecer á mocidade preuniversitaria os distintos itinerarios formativos que poden cursan nas seis facultades e escolas do Campus Terra, así como nos dous centros adscritos: Escola Universitaria de Relacións Laborais e Escola Universitaria de Enfermaría.

Do mesmo xeito que en edicións anteriores, o campus de verán Xuvenciencia Lugo 2017 presenta un módulo para veteranos, ao tempo que brinda servizo de aloxamento desde a noite do 2 de xullo ata o 8 de xullo, para poder gozar das actividades programadas polos monitores da A.D.C. Lumieira Lugo. A presente edición aspira, como primordial obxectivo, a impulsar a convivencia. Por este motivo, ofertáronse prazas con aloxamento para que todo o alumnado interesado poda aprender a convivir cos seus futuros/as compañeiros/as de carreira. Ademais, este proxecto de divulgación científica conta con máis de 104 eventos programados e está avalado pola participación duns 146 docentes da USC e outro persoal de apoio.

O V Campus de Verán XuvenCiencia iniciarase coa celebración dunha charla divulgativa a cargo do físico Cibrán Santamarina, quen fixo o seu doutoramento no CERN, onde sigue a colaborar na actualidade, co título “Elemental, querido Schrödinger”. Santamarina traballa no departamento de Física de Partículas da USC.