A Facultade de Humanidades do Campus Terra da USC presenta a súa oferta académica en Edugal

O 6º Salón da Oferta de Educación e Formación de Galicia (Edugal) acollerá entre este mércores 15 e o venres 17 de febreiro, no Recinto Feiral de Pontevedra, un espazo expositor no que a Facultade de Humanidades do Campus Terra da USC presentará a súa oferta académica.

Edugal é un punto de encontro de estudantes, profesores, orientadores, pais e nais, responsables de centros educativos e profesionais da educación, no que ademais dos expositores, celébranse obradoiros, xornadas técnicas e actividades paralelas durante os tres días da feira. O venres 17, a partir das 11.00 horas, a decana da Facultade de Humanidades, María Isabel González Rey, participará nunha charla de orientación universitaria sobre o ámbito humanístico.

A Facultade de Humanidades do Campus Terra da USC imparte na actualidade o Grao en Lingua e Literatura Españolas, así como o Grao en Ciencias da Cultura e Difusión Cultural, o cal pode cursarse de forma presencial ou mediante a modalidade semipresencial, a cal permite ao seu alumnado cursar a titulación a través dunha plataforma virtual e asistindo só ás clases que o alumno ou alumna considere indispensables. Asemade, a Facultade de Humanidades imparte o Máster Universitario en Servizos Culturais, tamén en virtude da modalidade semipresencial.

Neste espazo expositor, poderase atopar información sobre o conxunto da oferta académica do Campus Terra.