Aberta a convocatoria de mobilidade por convenio bilateral para a realización de estudos en universidades de países extracomunitarios

A convocatoria de mobilidade por convenio bilateral para o próximo curso 2018-2019 permanecerá aberta ata o 14 de febreiro, tanto para alumnado de grao como de máster. A convocatoria está dirixida á realización de estudos en diversas universidades de países extracomunitarios, nomeadamente países de América latina, Estados Unidos, Canadá, Australia, Rusia, Xapón, República Popular de China, Corea do Sur ou Taiwán e coas que a USC ten formalizado un convenio de intercambio bilateral de estudantes. Esta convocatoria será única tanto para o alumnado que vai solicitar a realización de estudos durante o primeiro ou no segundo semestre, así como para o curso completo.

A mobilidade poderá solicitala estudantado matriculado este curso na mesma titulación para a que solicita o intercambio, a cal deberá corresponderse a estudos conducentes á obtención dun título de grao ou máster acreditando unha nota media mínima de 6.

A Facultade de Ciencias acollerá o vindeiro 1 de febreiro, a partir das 11.00 horas, a primeira das charlas que a Oficina de Relacións Exteriores da USC ten previsto dar no Campus Terra e nas que o estudantado poderá coñecer de primeira man os detalles desta convocatoria, así como consultar as súas dúbidas. Ese mesmo día, a partir das 13.00 horas, será a quenda da Escola Politécnica Superior de Enxeñaría; e o 5 de febreiro, ás 12.00 horas, na aula e-Terra, situada na Biblioteca Intercentros, celebrarase a última das sesións informativas. Ademais, as persoas interesadas poderán realizar as súas consultas no correo electrónico bilateral.exchange [at] usc.es (bilateral[dot]exchange[at]usc[dot]es)