Estudantes da Universidade de Maiores de Estremadura visitan o Campus Terra da USC nun programa de intercambio universitario

O vicerreitor de Coordinación do campus de Lugo Javier Bueno, a directora do IV ciclo da USC María Esther Olveira e a coordinadora do IV ciclo en Lugo Teresa Rodríguez recibiron este xoves na Casa do Saber a trinta alumnos e alumnas da ‘Universidade de Maiores de Estremadura’.

Logo de darlles a benvida aos e ás asistentes, Bueno aproveitou a súa intervención para explicar o proxecto de especialización do Campus Terra centrado “no uso sustentable dos recursos da terra” e de carácter semellante á sede de Almendralejo pertencente á propia Universidade de Estremadura.

Procedentes de Almendralejo, Badajoz, Plasencia, Mérida e Cáceres, o alumnado chegou ao Campus Terra no marco dun intercambio con estudantes do programa de IV Ciclo da USC. Trala recepción, o grupo tivo a oportunidade de realizar unha visita guiada á catedral de Lugo e gozar dun xantar no recinto histórico.