O Campus Terra acolle un obradoiro de iniciación en metodoloxía bosquescuela
A Universidade de Verán da USC celebrará na Facultade de Formación do Profesorado no Campus Terra un obradoiro de iniciación en metodoloxía bosquescuela, baixo a dirección do profesor Rubén Navarro Patón.
O obradoiro, que terá lugar os días 20 e 21 de xuño, e cuxo prazo de matrícula finaliza o 9 do mesmo mes, abrirase cun taller sobre a natureza como aula. A continuación, ensinarase a deseñar actividades ao aire libre relacionadas coa lóxica, a aritmética, a xeometría, a área de conxuntos e as magnitudes, temas contemplados dentro dos currículos oficiais establecidos polas diferentes consellerías de Educación e que se cumpren como Centro de Educación Infantil Homologado. O xogo espontáneo ao aire libre e a neurodidáctica e psicoloxía do desenvolvemento Infantil pecharán as actividades desta primeira xornada.
Finalmente, o día 21, abordarase a lectoescritura con elementos naturais, experiencias e avaliacións do modelo europeo das escolas infantís ao aire libre, a escola no bosque e a educación activa a través da natureza e a arte.