O Campus Terra da USC estreita lazos con universidades indonesias

O xestor de Internacionalización do Campus Terra da USC, Pedro Fiz Rocha Correa, iniciou este mércores 29 de marzo unha visita de dúas semanas a Indonesia a través da cal se pretende coñecer de primeira man o sistema universitario do país, así como estreitar lazos con distintos centros de referencia no eido agroalimentario.

Durante as primeiras xornadas, Rocha Correa asistirá a un workshop na Bogor Agricultural University, no que distintos expertos aproximaranse á internacionalización no ámbito universitario. A creación de consorcios, a búsqueda de financiamento para proxectos, a cooperación institucional ou como definir unha estratexia adecuada de internacionalización, así como a empregabilidade no contexto internacional, serán algunhas das cuestión obxecto de análise neste obradoiro de expertos.

O xestor de Internacionalización visitará ao longo da semana do 3 de abril diferentes universidades indonesias e aproveitará para presentar a oferta académica do Campus Terra, o campus da Universidade de Santiago de Compostela especializado na sustentabilidade social, económica e medioambiental do uso da terra.