O Campus Terra da USC explora liñas de colaboración con universidades e centros de experimentación de Indonesia
O xestor de Internacionalización do Campus Terra da USC, Pedro Fiz Rocha Correa, visitou este mércores o centro de experimentación PIAT-UGM, unha unidade especializada na produción sostible de cultivos e gandería dependente da universidade pública Gadjah Mada de Indonesia, unha institución académica na que están matriculados preto de 60.000 estudantes.
Durante a súa estadía no centro de experimentación PIAT-UGM da universidade de Gadjah Mada, Rocha Correa mantivo unha reunión co decano da Facultade de Forestais e mañá está previsto que acuda ao bosque de Wanagama, unha referencia no país en conservación e recuperación de especies forestais fráxiles e na investigación de novos usos compatibles coa conservación.
O Centro PIAT-UGM ten fins docentes, investigadores e tamén se utiliza como centro de formación continua para os axentes forestais dependentes da Administración central de Indonesia.
A visita realizada por Rocha Correa a este centro universitario encádrase no marco dos encontros que está a manter desde comezos de mes o xestor de internacionalización do Campus Terra da USC con responsables académicos de distintas universidades de Indonesia, a fin de explorar futuras liñas de colaboración e mesmo de intercambio de alumnado, docentes e investigadores entre os centros asiáticos e os centros universitarios do campus de Lugo.
Na primeira parte da súa estadía en Indonesia, Rocha Correa mantivo unha reunión coas universidades privadas de Yogyakarta, logo de asistir a un workshop na Bogor Agricultural University, un foro no que distintos expertos fixeron unha aproximación á internacionalización no ámbito universitario. O percorrido do xestor de Internacionalización do Campus Terra da USC polo país asiático rematará o sábado cunha visita a unha explotación de té cunha superficie aproximada de 1.000 hectáreas que está xestionada pola universidade de Gadjah Mada en colaboración co Ministerio de Agricultura.