O Campus Terra da USC súmase ao pulo aeronáutico cunhas xornadas sobre ‘drones’ na Escola Politécnica Superior

Máis de 25 empresas ligadas aos ámbitos da Xeomática e a Topografía e ao  deseño e desenvolvemento de aeronaves, así como profesionais do sector aeronáutico e investigadores de varias universidades participarán en Lugo do 31 de marzo ao 2 de abril nas xornadas sobre vehículos aéreos non tripulados organizadas pola Escola Politécnica Superior do Campus Terra da USC en colaboración co Colexio Oficial de Enxeñaría Xeomática e Topografía e o aeródromo de Rozas.

O programa das xornadas inclúe relatorios e presentacións de proxectos, ‘networking’ con empresas, cinco obradoiros prácticos de diversa temática, exposicións de ‘drones’ e outros vehículos aéreos non tripulados, ademais dunh exhibición aérea nas instalacións do aeródromo de Rozas, no concello de Castro de Rei.

A celebración destas xornadas sobre ‘drones’ constitúen unha boa oportunidade para amosar todo o potencial investigador e tecnolóxico que pode ofrecer o Campus Terra da USC cara o desenvolvemento e as futuras accións executadas ao abeiro do centro de investigación aerotransportable de Rozas, segundo sinalaron o vicerreitor Javier Bueno; o director da EPS, Tomás Cuesta, e a tamén profesora no Campus Terra da USC e delegada territorial en Galicia do colexio de enxeñeiros e Xeomática e Topografía, María José Iniesto.