O ciclo ‘Ciencia para xoves investigadores’ achega 485 estudantes de ensino secundario á Facultade de Ciencias

Alumnos de 4º curso de ESO do IES Nosa Señora dos Ollos Grandes de Lugo abriu este xoves a primeira quenda de visitas da nova edición do ciclo ‘Ciencia para xoves investigadores’, un programa de estímulo de vocacións científicas entre o estudantado de ensino medio impulsado polo persoal da Facultade de Ciencias do Campus Terra coa pretensión de achegar a súa oferta docente ao alumnado preniversitario.

Logo dun breve acto de benvida, guiado polo decano da Facultade de Ciencias, Francisco Fraga López e os coordinadores do grao en Enxeñería de Procesos Químicos Industriais e do grao en Nutrición Humana e Dietética, o persoal do centro universitario lugués conduciu diferentes sesións prácticas nos laboratorios da Facultade, onde os estudantes puideron realizar os seus propios experimentos.

Ata o 23 de xaneiro, este ciclo terá como protagonistas aos alumnos de ensino secundario do IES Anxel Fole, IES Sanxillao, IES A Pinguela de Monforte, IES Gregorio Fernández de Sarria, CPI Ramón Piñeiro de Láncara, Colexio San José, CPI de Castroverde, Colexio Padres Franciscanos, IES Xoan Montes, Colexio Divino Maestro e Colexio Maristas-A Inmaculada. As actividades desenvolveranse en quenda de mañá, de 10:00 a 13:30 horas, e o centro agarda recibir a preto de medio milleiro de estudantes preuniversitarios.

Como nas pasadas edicións, e debido a gran demanda por parte dos colexios e institutos, foi necesario ampliar as datas de celebración deste ciclo. Así, entre o 20 e 23 de maio tamén visitarán a Facultade alumnos do Colexio María Auxiliadora e do IES Lucus Augusti.