O pastoreo como saída á crise de prezos do leite, a debate no Campus Terra da USC

Analizar as vantaxes do pastoreo fronte á actual crise de prezos do leite. Esa é a finalidade da xornada técnica que acolle a EPS de Enxeñaría do Campus Terra da USC e que reúne este martes a produtores e demais profesionais ligados ao sector.

"Esta xornada o que pretende é falar de algo que ata o de agora é marxinal en Galicia como é o caso da produción de leite en pastoreo. Por iso é interesante coñecer as experiencias doutros países europeos", afirmou o profesor da USC, Francisco Sineiro, quen organiza esta xornada conxuntamente co xestor de Internacionalización do Campus Terra, Pedro Fiz Rocha Correa.

O programa do foro contén a exposición dos relatos de tres produtores de Holanda, Francia e Irlanda, para coñecer as experiencias rexistradas nas súas explotacións de vacún.

"A realidade galega está composta por explotacións maioritariamente medianas ou familiares. Con todo, nelas tamén pode buscarse a eficiencia e a sustentabilidade", afirmou o vicerreitor de Coordinación co campus de Lugo, Javier Bueno, quen inaugurou a xornada acompañado do deputado provincial, Eduardo Vidal.

Técnicos do Centro de Investigacións Agrarias de Mabegondo, dependente da Xunta de Galicia e do Laboratorio Interprofesional Galego de Análise do Leite completan esta xornada coa abordaxe das técnicas de pastoreo como alternativa para miticar os efectos derivados da crise de prezos.